2015年6月3日星期三
最近身邊幾位好友相繼懷孕,或剛剛產子,搵陪月話題,又再在我身邊熾熱起來!
大家的話題當然指向我,因為我有請陪月經驗,當然最想知我的陪月好唔好,以及我的揀選準則。
Yuji BB肥肥白白,食療是主因。
 
我對她們說:「實不相瞞,我請的並非星級陪月,但你們好似想要星級人馬,呢一方面,我未必幫到你們喎。」
不過,我並非今次的話題核心,因為好友B剛剛怒炒了一個星級陪月,原因:「乜都叫工人做,自己印印腳,每星期去街市買送要$5,000,我淨係食過鯇魚,參茸海味食過兩次,就話用晒,我奶奶畀左二兩蟲草我,點有可能咁快食晒?」星級陪月死因明顯係「打斧頭」,而且打得幾過份!
 
我記得,上年曾經分享過另一位「星級陪月」故事,翻查一下,以下是寫於2014年6月30日的:
 
「話說她的雀友家住渣甸山,一向捨得食,本身對食材已經很了解。雀友的寶貝女懷孕了,愛女自己請了一個「星級陪月員」,雀友愛女心切,第一次見面就帶「星級陪月」去自己相熟的海味店買料。
雀友幫襯了她自己的海味店超過30年,熟絡程度盡在不言中,豈料「星級陪月」到店後猶如百彈齋主上身,將該店的所有海味彈到不值一文,仲話如果唔係你有相熟海味店要幫襯,佢仲可以一條龍幫你買齊所有材料,「唔使勞煩媽媽同婆婆落鋪揀咁辛苦!」雀友看在眼裡,早就氣上心頭,就睇下「星級陪月」的眼光有幾出眾。
豈料原來無料扮有料,催奶用的章魚香味撲鼻就彈話唔夠乾、蟲草就話大支的唔夠細支靚、仲話乾鮑唔夠澳洲青邊鮑又平又正,我帶你去邊度邊度買急凍青邊鮑啦。最後買了很多普通貨色回家,因為「星級陪月」話夠用。
返到屋企,雀友丈夫一睇,已經質疑雀友平時都唔係買二等貨色,何解今次會買到咁?一輪了解,認定「星級陪月」不滿雀友帶她去相熟海味店而非她指定的店鋪,冇「回佣」收所致。其中雀友丈夫認為,所謂「星級陪月」話澳洲急凍青邊鮑好過日本吉品乾鮑,根本係無中生有,咬定「星級陪月」唔識煮乾鮑所以有此偉論。最後要雀友丈夫親自出手買貨,使多一筆之餘,仲真係發現「星級陪月」唔識整乾鮑,所以咪主張用青邊鮑一解凍就得;坐月期間更發現「星級陪月」除了把口真係星級外,其他一無是處,最終婆婆與陪月相處得並不愉快。」
 
似乎很多人都拜名氣所賜,結果陪月未如心水。
首先,我最關心的是,其星級之名,從何而來?如果只是幫過明星做陪月就叫星級,就絕非我心目中的「星級」。
 
總結我的經驗,陪月只要愛心爆棚,非常愛錫你的仔女,全心全意為你煮食,照顧BB,已經好足夠。不過,這些老生常談,並不是每個人都能「接受」。
 
重申一次,產後女士坐月調理非常重要,這是一個重新塑造身體的過程,足不出戶(除了帶BB出街檢查),注重食療,你會感受到一個非常難得的絕佳身體 。
 
最近,Y's RECIPES的店長報告,說很多孕婦上來,都問她:「到底Yoko如何做到產後迅速回復體態?BB食乜可以食到Yuji咁肥?」以店長對食療養生的知識,已經可以一一解答你們的疑問,反而她很好奇,很多孕婦都不知道坐月的重要性。其實現在流行母乳,特別是第一個月,不論是你埋身餵、定係泵人奶,媽媽身體好,人奶也特別營養豐富,受惠的當然是自己的BB!我身邊有好些朋友,一生完,已經認唔住要Happy Hour飲酒、出夜街、Shooping,置BB健康於度外,我老公曾經好粗俗的形容:「人衰奶差!」母親生活不健康,又沒有食療配合,出來的母乳,真係比奶粉更差,食到自己的BB皮黃骨瘦,我特別為這些BB心痛。
 
當然,也有聽足我教的好友,成績非常突出!昨天收到一位PR好友的Whatsapp,她就是參考了我的意見,BB又係米芝蓮級數,腳瓜一節節,好鬼抵打!
 
可惜,現代大部份女性欠缺養生慨念,到發覺身體不如理想時,已經後悔莫及,Y's RECIPES有不少顧客,捉住店長問有何促孕調理,這個又是一個養生慨念,再續。
 
————————————————————————
全新打造個人官方網站www.yokotsang.com已經面世,內容更集中,更易搜尋昔日文章及追縱美容軌跡!
 
 

總瀏覧次數


相關文章
月曆
Yoko 今日蹤跡