2015年6月11日星期四

剛剛的日本之旅,我自己的購買任務只有一個,花了兩小時,一落機便直奔目的地,買完剛好830pm,吃個豐富的晚餐,之後四日都是為兒子購物,我只是在途中經過望兩眼,合眼緣便買,不合則一走了之,沒有浪費太多時間。 今次最大目的,就係要去日本最大規模的嬰兒用品店Akachan朝聖! Akachan可以話係香港媽媽的血拼天堂,因為有好多新奇的嬰兒用品係香港搵唔到的,價錢方面,因為Yen平關係,好多都比香港便宜(睇完之後,你會發現,香港的嬰兒用品係好貴!),款式又多好多!而且,Akachan在6月15日起開始接受遊客退稅,點解我會知?因為我問有冇退稅時,在service counter內的中國翻譯對我講的,我在這裏,付了很多消費稅,但你們睇完呢篇文跟住去買,都會比我平8%(淚 ~~~)。 在東京都內,面積最大的Akachan位於錦糸町,相信好多香港人都未必聽過呢個地方,其實位於秋葉原旁邊,在新宿乘中央總武線向千葉方向,便可以直達錦糸町站。 在錦糸町北口出閘,向左行一分鐘就是KIT商場,商場6樓全層就是Akachan;5樓係無印良品同Uniqlo,兩個咁知名的品牌都租唔晒全層商場,但Akachan可以租全層,咁你就知呢一層有成個足球場咁大的Akachan,係幾咁有規模! 一出電梯,就係服裝部,一望無際的盡頭,香港真係搵唔到咁大地方! \ 因為夏天關係,BB水上用品非常齊全,吹氣用品之多,震驚香港七百萬人口。 鞋部選擇多而廣,如非我先去了新宿伊勢丹童裝部(這個又係必去之處,潮媽の聖地,另文再談),敗了好幾雙鞋子,才沒有在這裏失手。 強烈推介購買Polo BB鞋!左下角白色Polo logo帆布鞋,我在香港專門店買了,$400一對!同一款在這裏只售¥4,500,即係$279,等同7折,點解會平咁多? 在香港,好多準媽媽都為之心動的Combi「幻の電動搖搖床」,有新出的典雅柚木啡色,非常名貴的樣子。 售價是¥57,000,即約$3,534,我在香港買要五千幾,這裏平足$2,000!原箱坐飛機寄艙寄回香港,都抵。 BB沖涼用品在這裏的選擇多如恆星,我最欣賞呢個麵包超人沖涼座,靠背可以調高低,躺平BB或坐著也可以,係非常方便的沖涼神器,印象中只是約港幣二百多圓,我沒有買,因為兒子已經可以穩穩的坐著沖涼。 迪士尼系列吹氣浴盤,¥1,371,約$85,0-6個月適用,如果屋企細,這個收納會幾方便。迪士尼吹氣椅子又係可愛到暈低,¥1,834,約$114,買來送禮做手信,無敵。 強烈推介在這裏買BB車,在香港非常受歡迎的Aprica同Combi都平過香港,不過這些款式同香港一樣。所以我會推介在Akachan買香港沒有的款式,例如這個Jeep BB車。我其中一部BB車係Mini Cooper,同車廠買專利的BB車,一向同品牌設計相承。Jeep的大車轆粗礦外型,但輕巧的重量,我深深喜愛。 我最欣賞它摺起之後,可以成支棟高企定定。紅色品牌logo highlight仲好有「跑味」。 睇埋個價錢,¥9,074,約$563!在香港邊度可以搵到一部五百幾蚊的BB車係型成咁?除了車重達5kg呢一點未夠輕,我真係掙扎了三十分鐘買好唔買好! 因為同場有另一部我都好想買的BB車,叫「Pockit」,我在香港未見過有呢部聲稱全球摺得最細部的BB車! 就咁睇平平無奇,但係睇埋佢可以摺到好似notebook咁細部,重量是4.8kg,就係佢厲害之處! 價錢方面,¥18,334,約$1,136,淨係睇價錢,或者你試下用相同價錢,去荷X、Mxxxxxcare睇下可以買到甚麼?   最後我們好嚴格,希望搵一部3kg以下的BB車,又要香港冇,又要摺得細,本來非常屬意Pockit,但因為實在太多東西要帶回香港結果冇買到任何BB車,但以上情報,對於準父母係一件非常重要的消息,平得太誇張了! 至於我有甚麼收獲?第一係BB揹帶,Akachan的選擇真係多得太誇張,看看揹帶的counter陣容: 幾經試用,結果買了右邊的ErgoBaby Performance 尼龍透氣網布黑色日本特別版。 左邊的星星紋也是日本別注版,不過我嫌佢密封不透氣,香港夏天用,BB會好熱,透氣尼龍較通爽。全黑是我認為最低調而又不影響自己衣著的顏色,我買要¥19,800,約$1,250,退8%稅的話,約$1,157。同香港差不多價錢,但兩個款式是香港沒有的。 另一個開心購物,是麵包超人坐著的D-bike小童單車,適合一歲以上小朋友,甚有設計味的嬰兒玩具。 有四種顏色選擇,睇埋價錢,¥5,547,約$344,無慮即決,買夠兩部。   加埋其他衫褲襪、小配件、揹帶,以及幫朋友買的用品,買了這麼一大車,是不是很誇張?不過我相信父母們去到Akachan,同我一樣買咁多都唔奇。 尋日我提過,在日本幾日,我差一點在池袋東武嬰兒部敗了一部Stokke BB車,因為平得好過份。 左邊的是入門版Stokke Scoot,香港的公價是$6,980;右邊是頂級型號Xplory,香港的公價是$11,480。 Stokke Scoot日本的售價是¥79,920,退稅後是¥74,000,即$4,588。 Stokke Xplory日本的售價是¥132,840,退稅後是¥123,000,即$7,626。 一部平$2,400,另一部平$4,000,真係連日本機票都慳到一張!  我推介去東武買的原因,是日本大部份百貨公司雖然有退稅,但需收取1.1%退稅手續費,即係你只可以退6.9%,而非8%。但東武百貨是少有不設退稅手續費的百貨公司,真正退足8%,連呢一點都考慮埋,我真係為大家讀者設想,幫你慳到盡,哈哈! 不過,因為我坐JAL關係,行李件數上限是四件,實在無辦法帶一件原箱Stokke回香港,所以你們想買上述的大件產品回香港,事前計算一下寄艙行李的件數及重量,你會更加滿載而歸。

—————————-
 
全新概念食療養生館Y’s RECIPES隆重登場
Instagram

總瀏覧次數


相關文章
  • 日本BB購物の殿堂 --- Akachan
    剛剛的日本之旅,我自己的購買任務只有一個,花了兩小時,一落機便直奔目的地,買完剛好830pm,吃個豐......
  • Yen大跌!買爆日本搵平Yen攻略
    日圓大跌,每跌一次,我個心又癢一次,日本之旅,幾時都想啟程! 適逢完成手頭上的新書工作,閉關了......
  • 日本買Hermes Birkin必勝法
    名牌袋界,有很多不可思議的事情,不合理卻又被fans們合理化:一個普通人,冇可能就咁行入Hermes......
  • 潮媽潮拜日本潮童裝聖地
    上星期一篇「日本BB購物の殿堂 --- Akachan」,反應極佳,當中提及很多日本獨有的、或日本品......
  • 春困抗疲勞 提神食物法
    「疲勞」是大家都該關注的議題,如症狀遲遲未改善,長期下來更可能導致免疫力下降,使慢性病找上身,不可不......
  • 大阪直撃 美容展新話題
    我經常到訪日本美容展,繼五月前往東京,今回到大阪,就是喜歡搜索最新扮靚與健康資訊,與讀者們分享啊!未......
月曆
Yoko 今日蹤跡