2014年3月30日星期日

每年三月尾,又會被老公捉住傾錶經,一齊睇下瑞士巴塞爾錶展有哪些新錶。

雖然男性的興趣我未必認同,但至少要陪他一起投入,才顯得女性是善解人意,更可以促進雙方感情。 


對於複雜功能手錶,我是不會明白的啦,我的程度只可以跟他說說:「Rolex今年又點呀?」

原來今年的焦點係GMT-Master II紅藍圈。其實呢個款我真係見過好多次(佢自己都有隻不過係全黑圈,綠色針),到底呢隻有甚麼特別?「呢輪個個撈迷都玩番紅藍圈GMT,所以早幾年轉款後得番黑圈,上年出多隻黑藍圈,宜家咪出番隻紅藍圈囉,話晒紅藍圈先係正宗GMT兩地時間顯示,紅色代表日間、藍色代表夜間.......(下刪好多字)」

咁正宗,你又會唔會買番隻玩下呢?「黐線!呢隻白金錶,我估要16-18萬之間!就算係鋼帶都未必會買。」官網都冇寫係用甚麼物料,你點知係白金?睇相似鋼帶咋喎。「Reference number叫116719,9字尾代表白金,睇數字就知啦。0字尾先係鋼帶。」哦。「Rolex迫班錶迷要用高價先玩到正宗GMT,呢招都算佢絕!」


到底今年有冇買得過的新Rolex呢?「勉勉強強有隻,叫Sea-Dweller 4000。」

同Submariner一樣樣,有乜咁特別?「唔同!呢隻叫深潛,4000呎防水,Submariner得1000呎防水。成隻錶厚身好多又重好多,戴上手質感不一樣。」都唔會潛到咁深水,為乜呢?「法拉利夠4、500匹馬力,唔通載你又要下下開到時速360公里?呢D叫力的表現,代表游刃有餘。」咁話晒都係新錶,點解你話佢勉勉強強?「之前Rolex將Sea-Dweller停產,用另一款叫Sea-Dweller Deepsea的代替,隻錶有成44mm直徑,12800呎防水。可能大得濟兼重得濟,咪出番隻40mm直徑的Sea-Dweller,就一就番市場需要呱。所有設定、機芯都同上一代一模一樣,較明顯分別係錶圈特料轉用Cerachrom物料,搪瓷硬度,只有鑽石先刮得花。叫做畀D想買Rolex的人多一個選擇錶款,舊有用家未必會買。」


即係今年Rolex都係冇乜驚喜?「算係冇啦,個個都希望有新款Daytona,點知又再失望一年。話晒所有運動錶款呢幾年都已經轉晒款,仲爭Daytona咋。」

原來好多Rolex迷都希望有新款Daytona,因為呢一代已經歷時15年 ,本來上年係Daytona誕生50週年,應該係出新款祝賀的最佳時機,點知Rolex出了第一隻鉑金款Daytona作為代表,令錶迷大失所望,所以今年有粉絲惡搞了一些新款,期望Rolex可以接納意見,例如這一款:

我自己睇見都好想買喔!

粉絲仲幫佢改名做Monochrome。

唯有寄望下一年有Daytona新消息啦。

—————————————————————

本週《MORE》專欄精采內容:

懷孕中/敏感肌 對付黑色素策略

自懷孕起皮膚容易敏感,經常局部泛紅痕癢,幸而快散去;懷孕初的第二個月,額頭起好多暗粒,兩星期後平復了;第三個月到背部起紅點,持續整個月方停止;現在我孕期是五個多月,到另一皮膚問題開始埋身.......到底有什麼辦法解救?

請留意今期《MORE》雜誌內我的專欄。

Instagram


總瀏覧次數


相關文章
月曆
Yoko 今日蹤跡