2014年2月3日星期一

有讀者留言想睇我的 Chanel collection,想了又想,其實歷年來真是對Karl爺著了魔似的,買下很多 Chanel,但也賣了很多......所謂 classic、襟興都是讓自己付款時求心安的借口,當我有一刻不再留戀決意分手,帶它到米蘭站之時(名牌的保良局),那個差價洪溝讓我更深信,當初的借口是多麼可笑!

及後醒覺,玩物投資策略有變,深信一隻好的手錶才是真正的 classic 和襟興,起碼抵得住時間損耗值,眼光好甚至可以抗跌兼有賺,何況一般女仔對手錶的認識未至對手袋般深,倒不如分享一些我歷來的手錶 collection,手錶話當年。
Cartier Pasha C
這是我大學畢業後,媽咪送給我的「成人禮」。
當時對手錶完全沒有認識,除了知道是 Cartier 外,也不知這是甚麼款式和型號,直至發現有年長的同事有意無意間用眼角瞄實我的手腕,加上聽到些諷刺話,說甚麼錢都未識搵就戴 Pasha C,意識到甚麼叫「有色眼鏡」!
當然,後來就知 Pasha C 是不少女性的夢幻錶款,然而夢幻背後的現實是殘酷......Pasha C 完全唔保值,買時二萬多,回收價才八千,幸而是媽咪送的首隻手錶,那份紀念價值是無價寶!


Panerai Luminor Marina Automatic
早幾年大錶面熱潮回歸,湊熱鬧之下,買了呢款有好幾個特別愛儲錶明星都戴的 Panerai。
04年買入,當時只是遇到個錶痴,說不應買亳無挑戰性的 Rolex,屢勸放膽買 Panerai,又話女仔手腕幼,戴大錶的衝突感更型。反正當時覺得 Rolex 佬味重,加上Panerai只是幾位識貨的明星有入,普遍人仍未洞悉大勢,於是就買了 Panerai。
起初真係覺得好fashionable,但戴咗一排新鮮感欠奉,就衰衰咁嫌佢外型太大嚿,而且好重手,講真完全唔舒服,又厚又易撞到嘢,之後就無乜戴過咁滯,迫佢入盒唔准出街。
直至前排有個朋友買了和我同款的,問起我買幾錢,我答 $23,000,佢當堂打個突,原來今年已經加價至四萬八千,貴咗成倍,回收價和我的買入價相若,賺晒!
試想,除咗買某些指定款式型號Hermes可以發圍外,仲有咩手袋可以同名錶一樣用過都有得升足一倍吖?!


Panerai Radiomir Black Seal
由於 Luminor Marina Automatic 錶身太厚太重太唔好戴,但不知不覺間對 Panerai有份情意結,加上大錶面持續流行,便繼續發掘 Panerai 其他適款式。終於一見鍾情的是,錶盤設計簡單、沒有槓杆式錶冠保護及錶身較薄的 Black Seal 成為 my next target。
於是到中環太子大廈專門店看看,至知呢隻錶非常受歡迎,waiting list 水蛇春咁長,非常失望心諗實買唔到之際,卻被我隔星期在日本東京遇見它,相信就是緣份,試戴時發現真係輕得多又貼手腕 ,於是立刻襟錢,用了 50萬yen 據為己有了。
戴了之後,從來未試過有女性朋友問起這錶的來歷,問來問去都係男性友人,一句又一句「識貨」、「襯晒你隻手」之聲此起彼落;卻其實,後來才發覺手錶要手上鏈好鬼煩,即係每日都要上鏈,否則戴戴下會半路「停錶」!
我對上一次戴它去北京,在回程當日朝早就係唔記得上鏈(三日之旅只係頭一日有上鏈),結果在機場免稅店購物時,以為未夠鐘(實際上係手錶時間停了)繼續好 relax 咁買嘢,突然無意中看到手提電話顯示的時間,即大吃一驚狂奔,爭 D 上唔到機!
所以奉勸女仔買錶,千祈唔好買上鏈款,要揀 Automatic!


Rolex Daytona
這是最新成員,上年加入,當我與身邊識錶之人談論:甚麼錶最保值?大部份的答案都是 Daytona,有些說是 Patek Philippe;但後者動輒廿幾三十萬一隻,真係買唔起,然而前者的鋼帶黑/白面絕非我杯茶,我只係對圖中金鋼款帶點興趣。
當我宣告就係呢隻時,身邊最錫嗰位就話:「儍咩,諗真 D喎...金鋼款真係無咁保值呢!」但那一刻我覺得揀錶同愛情都係盲目,不應吓吓計過度過,而呢隻錶就正正是求婚紀念之物!
時至呢刻諗起,都覺得佢係我的 best choice,上年在日本買(請重溫:日本買錶),售價是 88萬 yen,當時的匯率是8.1,今日已經 9.4 了!
棄傳统鑽戒,揀破格手錶,時間證明選擇是對的!

總瀏覧次數


相關文章
月曆
Yoko 今日蹤跡